Глас 7. Во вторник утром. Тропари и стихиры на каждый день

Седа́льны покая́нны. Гла́с 7:

Иму́щи, душе́ моя́, врачевство́ покая́ния, приступи́ припа́дающи и воздыха́нием вопию́щи: Врачу́ ду́ш же и теле́с, свободи́ мя, Человеколю́бче, от мно́гих мои́х согреше́ний, сопричти́ мя блудни́це и разбо́йнику, и мытарю́: и да́руй ми́, Бо́же, беззако́ний мои́х проще́ние и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

И́же Петро́во отверже́ние слеза́ми очи́стив, и мытаре́ва согреше́ния воздыха́нием прости́в, Человеколю́бче Го́споди, поми́луй мя́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Ра́дуйся, Невмести́маго в Небесе́х, вмести́вшая во утро́бе Твое́й: ра́дуйся, Де́во, проро́ков пропове́дание, Е́юже возсия́ Емману́ил: ра́дуйся, Ма́ти Христа́ Бо́га.

Седа́льны. Гла́с 7.

Мытаре́ву покая́нию не поревнова́х, и блудни́цы сле́з не стяжа́х: отчаява́юся бо от недоуме́ния такова́го исправле́ния. Но Твои́м благоутро́бием спаси́ мя, Бо́же, я́ко Человеколю́бец.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

И́же блудни́цы сле́зы, и Петра́ прие́мый, и мытаря́ оправда́вый из глубины́ воздохну́вша: и мене́ отча́яннаго от де́л уще́дри, Спа́се, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Святи́и Твои́, Го́споди, на земли́ подви́гшеся, врага́ попра́ша, и ле́сть и́дольскую упраздни́ша: те́мже и венцы́ от Тебе́ прия́ша Человеколю́бца Влады́ки и ми́лостиваго Бо́га, подаю́щаго ми́рови ве́лию ми́лость.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Превозшла́ еси́ Си́лы Небе́сныя, зане́ хра́м показа́лася еси́ Боже́ственный, благослове́нная Богоро́дице, я́ко ро́ждшая Христа́ Спа́са ду́ш на́ших.

Седа́льны. Гла́с 7.

Я́ко блудни́ца припа́даю Ти́, Человеколю́бче, а́ще и слеза́ми ве́сь недоуме́юся ко умиле́нию: моли́твами Предте́чи я́ко о́ну умили́, Ми́лостиве, и спаси́ мя.

Го́споди, скве́рну ду́ши моея́, ми́лости Твоея́ иссо́пом, уми́лостивлься я́ко Бла́г омы́й, Спа́се, и очи́стив от скве́рны тиме́ния страсте́й, поми́луй мя́, Влады́ко, спаси́ созда́ние Твое́ мольба́ми Предте́чи Твоего́, Еди́не Многоми́лостиве.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Предста́тельнице те́плая и Засту́пнице христиа́н еси́, Богоро́дице Всепе́тая: те́мже с Предте́чею, Сы́на Твоего́ моли́ обрести́ на́м ми́лость.

На стихо́вне стихи́ры покая́нны, гла́с 7:

Я́ко непло́дную смоко́вницу не посецы́ мене́, Спа́се, гре́шнаго: но на мно́га ле́та проще́ние ми́ да́руй, напая́я ду́шу мою́ слеза́ми покая́ния, да пло́д принесу́ Ти ми́лостыни.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Я́ко Со́лнце сы́й Пра́ведное, просвети́ сердца́ пою́щих Тя́: Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Посреде́ суди́ща законопресту́пных ра́дующеся вопия́ху страстоно́сцы Твои́: Го́споди, сла́ва Тебе́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Богоро́дичен: Све́т, Христе́, прозя́бл еси́ от Де́вы, и просвети́л еси́ ро́д челове́ческий: Го́споди, сла́ва Тебе́.

Блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Блаже́ни и́згнани пра́вды ра́ди, я́ко те́х е́сть Ца́рство Небе́сное.

Стру́пы моего́ се́рдца неисце́льныя, Го́споди, уврачу́й, я́ко Еди́н Вра́ч ду́ш же и теле́с: и ступа́ти ми́ пра́во всегда́ поспе́й во спаси́тельныя пути́.

Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Предтеки́й Пра́ведному Со́лнцу, Христо́в Крести́телю, свети́льник души́ моея́ угаше́ный мно́гою зло́бою, возжзи́ Боже́ственными моли́твами твои́ми, я́ко да ублажа́ю Тя́ всегда́ спаса́емь.

Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Страда́вше и венча́ни бы́вше, врага́ посрами́ли есте́, и ны́не жи́тельствуете на Небесе́х, све́та непристу́пнаго исполня́еми прему́дрии му́ченицы, моля́щеся о душа́х на́ших.

Сла́ва Отцу́ и Сы́ну и Свято́му Ду́ху:

Уврачу́й души́ моея́ стра́сти неисце́льныя, Боже́ственная Тро́ице: и исхити́ мя гее́нны, и искуше́ний, Я́же во Еди́ном Божестве́ сла́вимая благоче́стно: и ве́чнующее ми́ Ца́рство да́руй.

И ны́не и при́сно и во ве́ки веко́в. Ами́нь:

Богоро́дичен: Вмести́ла еси́ нетесноме́стно во чре́ве Невмести́маго: Его́же всегда́ моли́, Ма́ти Чи́стая, тесноты́ вся́кия и страсте́й наведе́ния изба́вити рабы́ Твоя́, любо́вию Тя́ сла́вящия.